2009 Apr 9-11
決定又去汕頭啦~~今次去3日, 好想睇下表姐個bb, 又好想去食野呀~~順便去抖抖氣!!
6:30AM起身, 之後去左M記食左個早餐, 坐火車去羅湖商業城下面搭8:20AM車, 係呢度坐車有個好處, 每20分鐘一班車, 如果係香港坐直通車就一日兩班, 趕唔到的話都幾麻煩, 加上豪華大巴, 坐都坐得舒服D, 價錢去程$170一位, 今次坐車冇瞓到, 攞部相機影下先!!
豪華坐椅大巴
今次車程比上一次耐, 差唔多5個鐘先落到車呀~(最快試過3個半鐘)坐到個人都傻下傻下, 打電話比表姐, 佢一早就係車站接我啦~~第一件事梗係番屋企探下舅父同舅母啦~舅母知我地肚仔餓, 去到已經整左炒牛肉河粉啦~~正!!
話明抖下, 今次我地都冇咩行程, 加上表姐夫開左餐廳, 都唔得閒帶我地去玩, 所以今次我地都真係好HEA, 冇野做, 見到對面細個住O既舊屋, 好想再入去呀~問下表弟仲有冇人住, 佢話有, 不過我地都仲可以入去睇睇, 呢間屋充滿住我細個O既回憶, 細個o既時候, 我地一家人都會每年番黎兩次, 兩家人兩間房, 公公一間, 細舅一間, 日日我地d小朋友就會係呢間屋到走黎走去, 露台舅父又養左好多小動物, 得閒又會去下公園玩下, 不過公公死後, 舅父就搬左去對面屋住啦~
呢間屋已經好舊啦~~我所知應該有文革前, 媽媽話佢係呢間屋出世, 佢今年都50幾, 我諗都有50幾年啦~~最近汕頭市政府話要舊區重建, 屋企附近大部份o既樓都拆哂啦, 都唔知將來仲有冇機會再見到佢, 今次入去影左少少相, 留番個念~
露台
紅地磚, 露台門口
番屋企必經o既石樓梯
依家先知一出樓梯係天井見到呢個窗係公公房
HEA左一個下畫, 食飯啦, 今次表姐帶我地去食我同得得o既最愛, 牛肉即係打邊爐
好似好靚咁, 不過都唔差, 比起香港, 呢到正好多, 不過都唔係最好食!!
第二日, 去左探表姐夫, 佢開左一間以台灣食品做主題o既快餐店, 我地都去幫襯下先
瞓醒先去, 過左午市冇咩人, 唔使同人逼!!
十幾蚊, 都幾多野, 我都食唔哂~
下畫去左表姐屋企同bb玩啦~~眨下眼識行識走啦~~上次去o既時候都係手抱咁大, 想唔應老都唔得啦~~ 佢個樣同表弟細個一樣, 外甥多似舅, 我信啦!!
夜晚個餐, 約左由細玩到大o既朋友一齊食飯, 今次去食四川菜, 佢地話呢間係汕頭都好出名, 不過我覺得佢都係就左廣東人o既口味啦~我唔係好食得辣都食得到^^不過講真, 都係幾好味!!
食完飯, 我d朋友知道我番黎, 都話要出黎見我, (又係去飲野)汕頭依家開左好多大型酒吧(都唔知係咪,我覺得似disco多d), 不過唔比影相, 冇相睇, 個晚玩得好開心呀~~得得仲要比我一個飲醉酒o既朋友從後擁抱, 嚇到佢成個彈開, 個女仔就慘d, 比得得推左去第二個人到!!
第三日, 瞓醒都十二點幾啦~今次我地決定坐夜d o既車走, 唔使去到羅湖人地放工時間塞車, 上一次塞車2點車, 番到屋企都9點幾, 又可以食多一餐, 今餐都係食我地最愛, 我同得得都好鐘意呢間到食, 新鮮d啩, 又可能係先入為主啩~
汕頭o既舊區
我的最愛
今次番去都係飲飲食食, 食到個人都頂唔順, 最開心得得啦~~食左兩餐牛, 唔知幾時可以再去呢, 其實我plan左十月再去, 不過呢個十月同事好似有野搞, 到時先算啦~~
留言列表
